من خلال المقال الاتى هانوضح ازاي تشتري عربية من الاتحاد الاوروبي بصفة عامة و
المانيا بصفة خاصة و تجيبها مصر
علشان ناس كتيرة بتسأل ازاي تستفيد من الاتفاقية ( زيرو جمارك ) ونشتري عربية مواصفات اوروبية تستاهل الفلوس اللي ادفعت فيها
اول حاجة لازم تعمل البحث بتاعك : و لو افترضنا انك ناوي تشتري عربية المانيا و اللي هايتطبق علي المانيا هايطبق علي باقي دول الاتحاد الاوروبي
معظم الناس حاليا في المانيا واوروبا بتستخدم المواقع بشكل كبير تتفرج وتسأل براحتها بدل ما ينزل ويلف ويعطل نفسه ويضيع وقته وبالتالي تدخل علي موقع
اول حاجة لازم تعمل البحث بتاعك : و لو افترضنا انك ناوي تشتري عربية المانيا و اللي هايتطبق علي المانيا هايطبق علي باقي دول الاتحاد الاوروبي
معظم الناس حاليا في المانيا واوروبا بتستخدم المواقع بشكل كبير تتفرج وتسأل براحتها بدل ما ينزل ويلف ويعطل نفسه ويضيع وقته وبالتالي تدخل علي موقع
وتختار
و المواقع كتيرة و لا حصر لها و لكن احنا حبينا نجمع افضل هذه المواقع و هاتكون على الترتيب كالاتى
دول احسن مواقع بالترتيب لبيع السيارات في المانيا وأوروبا عموما سواء جديدة أو مستعمله
و المواقع دي بيسمح لاي حد سواء داخل الاتحاد الاوروبي او خارجه انه يشتري سيارات سواء جديدة او مستعملة
دخلت ودورت كويس ولقيت العربية المناسبة ليك ولمزانيتك او عاوز تطلب العربية بمواصفات خاصة سواء داخلية أو خارجية و اتاكدت أن التاجر أو صاحب المعرض كويس وسمعته كويسه وشوفت آراء وانطباعات الناس علي شغله
نقط مهمة لازم تعمل حسابك عليها
لو هتشتري من ألمانيا اتاكد انك تلاقي تاجر في أو قريب من هامبورغ لان المانيا تعتبر دولة حبيسة مالهاش غير منفذ واحد للميناء و كمان علشان متخليش العربية تمشي كتير علشان توصل لميناء الشحن - ونش السيارات غالي هناك خليك حذر ووفر كل سنت تصرفه هناك وهكذا بالنسبة للدول التانية قرب علي اد ما تقدر من المدن الساحلية اللي فيها موانئ.. ومعظم المدن دي بيبقى تجار السيارات فيها كتير اوي
طيب خلاص انت كدا دخلت و دورت و لاقيت العربية المناسبة اه عايز اقولك حاجة مهمة مش من يوم و ليله هاتلاقي العربية ، انت في سوق و سوق كبير فا عايزك تتحلي بالصبر علي اد ما تقدر
حاول علي اد ما تقدر تتعامل علي المواقع مع التجار الألمان او اى تاجر يكون ابن البلد لأنهم ما عندهمش لف ولا دوران وابعد عن تجار شرق اوروبا .. وفي تجار عرب واتراك كتير بس مش كلهم كويسين فخليك حذر و لو شكيت في أي حاجه أو حسيت أن في حد بيجبرك علي حاجه وبيقولك هو النظام قوله شكرا
خلاص انت لاقيت العربية المناسبة و كلمت التاجر عليها و عرفت مواصفاتها بالكامل و مشيت اد ايه اذا كانت مستعملة و حالتها كويسة جدا و هل العربية متوافقة مع نظام
المرور المصري اسأل علي كل المعلومات و ياريت تسأل مستخلص للمشورة
ملحوظة
- العربيات المستعملة بتدخل مصر للمعاقين فقط و لازم يكون في جواب من معاق بقيادة سيارة يعني مش اي معاق يقدر يشتري عربية بإعاقته
-العربيات الجديدة متاحة لاي حد ممكن يقدر يشتري
نيجي بقي لمرحلة الشراء
- لو انت معاك تاشيرة شنجن يبقي خير و بركة اقطع تذكرة رخيصة علي اي طيارة رايحة اوروبا سواء للبلد او اي بلد قريبة منها هاتكون في حدود ال ٢٠٠٠جنيه و كمل بالقطار او الاتوبيس - فيلكس باص
- اما لو تعرف حد عايش في أي حته في اوروبا سواء بقي قريبك/ صحبك/ حد معرفة بيدرس أو بيشتغل بس يكون محترم وأمين.. تقدر تكلمه و تبعتله لينك العربية من علي الموقع وهو يبدأ يتواصل مع التاجر و لو قدر يروحله ويتفق معاه علي كل شيء يبقي افضل..ونفس الكلام بتبعتله صورة بطاقتك الشخصية أو الباسبور علشان يكتب العقد باسمك وتبقي اول مالك للعربية
- الطريقة الاخيرة انك تكلم شركات الشحن البحري في بلدك و تقولهم انك عايز تشتري عربية من البلد الفلاني و الشركات دي بيكون عندعا و كلاء في كل الدول بيعاينوا العربية و يشحنوها و لمعلوماته بتكون عمولاته قليلة
مرحلة الدفع
في 3 طرق للدفع
أولا: الاعتماد المستندي
ودا عبارة عن اعتماد بنكي مرتبط ببوليصة الشحن وبيتم كالتالي بعد ما تتفق مع التاجر علي السعر النهائي بتاخد منه اسم البنك ورقم الحساب وال IBAN و ال SWIFT.. واسم الشركة بتاعته GmbH
لو العربية جاهزة وعنده بتخليه يبعتلك رقم الشاسيه كمان علشان تكتبه في اوراق الاعتماد وبتروح البنك بتاعك وتقولهم انك عاوز تعمل اعتماد مستندي خاص بالعربية دي و برقم الشاسيه ده وبتودع الفلوس أو بيسحبوها من حسابك
البنك بيفتح الاعتماد بعد ما بيتواصل مع بنك التاجر في ألمانيا والفلوس ما بتتحولش للتاجر غير لما يشحن العربية علي المركب ويجيب للبنك بوليصة الشحن دا شغل بنوك
خد بالك أن البنكين(المصري & ألماني) بيخدوا عمولة ممكن توصل 15% علي المبلغ كاملا
ثانيا
لو تعرف التاجر أو واثق فيه تقدر تحوله الفلوس بشكل مباشر علي حساب شركته GmbH فالبنك وفي ال reference بتاع الحوالة بتكتب أن الفلوس دي خاصة بشراء العربية نوع كذا، موديل كذا و رقم شاسيه كذا علشان لو حصل حاجه غلط تعرف تاخد فلوسك
هقولك بعدين إزاي تتصرف لو حصل أي مشكلة
ثالثا
انك تحول ثمن العربية ومصاريفها (نقل وشحن) للوسيط اللي في البلد اللي نويت تشتري منها وبتخليه هو يشوف العربية ويكتب العقد بإسمك و يستلم العربية ويبدأ إجراءات الشحن وبرده نفس الكلام لما تيجي تحوله الفلوس تكتب فال reference بتاع الحوالة أن الفلوس دي خاصة بشراء العربية (مهم جدا) وتخليه يبعتلك صورة إقامته وعنوانه بحجة أن محدش ضامن الحياة من الموت
مجرد ما بيشحن العربية بيبعتلك الأوراق الأصلية كلها ب DHL لان تعتبر اسرع شركة شحن من العقد لفاتورة البيع و الضمان و بوليصة الشحن وكل حاجه
مرحلة الشحن
في 3 انواع للشحن
أولا : شحن عادي علي سطح المركب
ودا بيتكلف حوالي ٧٠٠ يورو.. بس مش مضمون لأن ممكن تتسرق من العربية أي حاجه او مثلا تتخبط أو تتخربش
سواء التاجر هو اللي بيشحن ومحدش هيقدر يعملك حاجه لأنك مش هتقدر تثبت انه حصل علي سطح المركب
VIP ثانيا: شحن
ودا شحن انضف شوية من النوع الاول انه بيدخل العربية زي كابينة وبيبقي عليه تأمين محترم ضد أي نوع من انواع الحوادث سواء سرقة أي حاجه من العربية أو اتخبطت اثناء شحنها علي المركب أو تفرغها ودا بيتكلف حدود ال 1000 يورو... وتعويض التأمين بيبقى حاجه محترمة ولو حتي كان خربوش صغير
ثالثا: شحن كونتينر
ودا شحن من اسمه انه بيحطوا العربية جوه حاوية وبيشحنوها ودا تكلفته ما بين 1000 الي 1500 يورو
طبعا التكلفة بتختلف من دولة ل دولة ومن ميناء ل ميناء تانية يعني تكلفة الشحن من إيطاليا مش هتبقى زي تكلفة الشحن من ألمانيا. .بالإضافة إلي مدة التوصيل اكيد برده بتختلف و ممكن ترجع لشركات الشحن في مصر و تعرف التكلفة المبدئية لكل نوع و ممكن تطلب من الشركات دي انها تجيبلك العربية و تعاينها من خلال الوكلاء بتوعهم هناك و بتديهم عمولة و ما بتكونش غاليه.
في معلومة لازم تسأل فيها التاجر وتعرف كويس ميعاد وصول المركب للميناء الي هتستلم منها .. علي ما يتطبقش عليك غرامات في الميناء بسبب التاخير في التخليص علي البضاعة وعموما من ألمانيا في مركب بتخرج من هامبورغ كل 15 يوم وبتوصل في خلال 15 يوم اسكندرية
مرحلة الجمارك
طيب علشان نكون واضحين الحكومة المصرية مش حكومة ساذجة علشان توافق علي الاتفاقية دي من البداية لو هي عارفة أنها هتخسر...لأن بند الجمارك بند له ثقله فالميزانية العامة للدولة ومافهوش تهريج والدولة معتمدة عليه بشكل كبير جدا... وبالتالي انت لازم تبقي عارف ان الخسارة من البداية هتبقى علي الوكيل... يعني الدولة هتاخد حقها من أي عربية هتدخل البلد غصب عن أي حد
طيب ايه المصلحة اللي ممكن نستفيد منها انك هتوفر ما بين 100 الي 200 الف جنيه من ثمن العربية لو اشترتها بنفسك من بره.. اللي هما كانوا مكسب الوكيل ومعارض التجزئة والعمولات. .إلخ
بالإضافة إلي أن التقفيل الألمانى أو الاوروبي بشكل عام بيختلف عن التقفيل الخاص بالسيارات اللي بتصنع خصيصا للشرق الاوسط زيها زي الموبايلات و الاجهزة الكهربائية.
يعني العربية المنتجة للسوق الالمانى احسن كتير من العربية المنتجة للسوق المصري علشان معايير وضوابط التصنيع و السلامة في المانيا أعلي من من معايير وضوابط مصر بمراحل
يعني ال 40% جمارك اللي كانوا بيدفعوا زمان ... مابقوش صفر% جمارك ولا حاجه ...هما خلينا نقول هيبقوا مابين 25 الي 30% مابين ضريبة القيمة المضافة وسعر دولار جمركي ومستخلصات و مخصصات و والخ وانت وشطارة المستخلص الجمركي اللي معاك
وبتدفع جمارك العربية يا أما مقدما في جمرك المطار فالقاهرة أو تسددها بنفسك لما تروح تستلم العربية في اسكندرية(لو شحن مركب أو vip) أو بورسعيد ( لو شحن كونتينر)
مرحلة الوصول واستلام العربية
العربية وصلت الحمد لله بتكون متفق مع مخلص جمركي بيفهم و عنده خبره في تخليص السيارات علشان ما تلبس في حاجة غلط و علشان يخش يخلصلك الأوراق... ودي حاجه أي مخلص يقدر يعملها بسهولة ..وبالنسبة لاتعابه دي باتفاقك معاه
طيب لو التاجر أو الوسيط اللي انت بعتله الفلوس علشان يشتري العربية اخد الفلوس وماردش عليك أو حسيت أن في أي تلاعب... بكل بساطة هتشوف محامي في البلد اللي انت حولت عليها الفلوس يكون من نفس مدينة التاجر ( ابحث علي جوجل عن محامين + اسم المدينة) وتبعتله ايميل أو تكلمه فالتليفون وتشرحله الموضوع وتبعتله صور من الأوراق والمحادثات اللي تمت مابينكم وصور التحويلات المالية( علشان كده قولت فوق لازم تكتب في ال reference بتاع الحوالة أن سبب التحويل هو لشراء سيارة وطبعا تكتبه بالإنجليزي ويكون معاك عنوانه أو صورة إقامته) اللي عملتها للتاجر او للشخص اللي انت وسطه للشراء... اللي هيحصل أن المحامي هيبدا يبعت للتاجر/ الوسيط خطابات انذار لرد الفلوس أو لاتمام عملية الشراء وشحن السيارة وفي معظم الحالات التاجر او الوسيط بيخاف وبيجيب ورا طالما دخل فالموضوع محامي وبيخلص الموضوع بسرعة علشان هو عارف انه لو وصل للمحكمة هيدفع فلوسك اكتر بكتير من اللي هياخدها منك بالاضافة لمصاريف المحامي بتاعك وكمان مصاريف المحكمة وتكلفة المحامين والمحاكم هنا غالية جدا وكمان ممكن تاخد تعويض.. يعني هيتخرب بيته... وكمان تعمله Bad review علي الموقع ..ودا في حد ذاته تدمير له ولسمعته. . لأن هنا ثقافة ال review وانطباعات الناس مهمة جدا وبتاثر علي مبيعاته علي الموقع بشكل كبير
حبيت اوضح الصورة ماشية ازاي و يا رب اكون قدرت افيدتك
#سيارات#عربيات#المانيا#الاتحاد الاوروبى#السويد#هولندا#ايطاليا#انجلترا#عايز#سيارات#اوروبى #باسعار رخيصة#شحن#سيارات#طريقة#شراء#سيارة_من_اوروبا_المانيا#
رائع
ردحذفاسعار بطاريات السيارات
انواع بطاريات السيارات